陳小春昨日成功在沙田駕駛學院通過電單車強制考試，小春表示多年前已曾經報考電單車試，但因親眼目睹一宗嚴重交通意外而擱置，所以小春聲言在將來考獲電單車牌後一定不會開快車。
陳小春昨日在沙田駕駛學院進行電單車強制考試，他一見記者出現即表現得有點訝異，小春說：「我之前嚟報名嗰陣時，有個職員已經話可以贊助我，不過我想低調啲，靜靜地咁考，所以我話唔需要，點知都俾你哋知道。」
小春表示他總共上了三堂，就成功通過強制試，可以衝出校門（指駕駛學院），駕電單車在馬路上學車，小春說：「其實啱啱考嗰陣真係好驚好緊張，考試同平時練習嘅心情梗係好唔同啦！」
其實小春在六、七年前已考獲私家車牌，幾年前亦曾報考電單車牌，但最終卻擱置計劃。
小春說：「嗰陣我重住喺清水灣，見到前面有對情侶揸住架電單車撞到血肉橫飛，我就即刻將考電單車牌嘅計劃擱置。」
小春表示如果成功考獲電單車牌後有意購買電單車，小春說：「我平時都有坐人哋嘅電單車尾，我𠵱家都係考自動波，我又唔會揸快車，所以打算第時買架大綿羊。」
而小春昨日在等待結果時，心情表現得有點忐忑，不過教車師傅大讚他說：「小春平時都揸得好穩定㗎啦！」
採訪：卓美娟
攝影：仇志德