方氏家族噚日可謂雙喜臨門，除咗陳太獲授勳，佢阿叔方心讓醫生亦將自己一生經歷寫成自傳《復康──生的使命》，噚日喺港大美術博物館舉行新書發布會，捧場者包括徐立之、陳日君、王䓪鳴同埋李鵬飛，當然唔少得方醫生嘅姪女陳方安生、女兒方敏生。方氏家族三代五十幾個親友亦差不多到齊，發布會後重一齊晚飯直落慶祝。
陳太同港大校長徐立之都極力推介方老本書，陳太重一直好親暱咁稱呼方老為「UncleHarry」，話UncleHarry係一個不屈不撓嘅人，兩年前中風都冇被打倒，對家族後輩非常關心愛護。
徐立之校長就話，方老書中提到香港淪陷時，佢為咗繼續喺上海嘅醫科學業，要賣血籌學費，非常感動，亦慶幸香港𠵱家嘅學生幸福得多。
方老乳名「四毛」，八方睇番佢同愛妻孔瑳嘅結婚照，發覺方太的確係個大美人，唔怪得戰亂時方老追到返內地，都要同青梅竹馬嘅小情人一齊。不過方太見到丈夫將兩人嘅結婚相刊出，大發嬌嗔，話早知就唔畀啲相佢。
其實方太不知幾緊張老公，自從方老中風後，衣不解帶，晚晚三點就起身睇吓方老，夫婦情深羨煞旁人。
傳真︰2623-9278
電郵︰