大市調整一日，又再升過，恒指收9773，升118點，成交增到67億元。不過，大市成交都係集中在大藍籌身上，單係一隻滙豐（005），已做咗22億元，而10大成交股份總值已有40億元，佔咗大市交投60%。二三線股仔就靜到發慌，好多隔成十幾二十分鐘都冇一手成交。
大藍籌一向都係大行同大戶做晒，所以，市場氣氛雖然麻麻，成交低迷，大行仍有啖好食，但係細行就慘嘞，日日賺埋啲佣都唔夠交租，咁樣捱法，唔捱得幾耐，近期已經有好多頂唔住，執完一間又一間（呢個月已經有4間），重會陸續有來。
香港嘅證券行業，曾經有過好長嘅風光日子，但今時今日，上市公司雖然愈來愈多，但成交就愈做愈縮，雖然話經濟疲弱影響好大，但同亞洲鄰近地區相比，本港股市嘅活躍程度，明顯係大為遜色。
弄到咁嘅田地，有關當局「扶強鋤弱」嘅政策難辭其咎。明年如果真係取消最低佣金制，剩低嘅幾百家經紀行，起碼再執多一半。
噚日成交增加，恒基系有唔少功勞，10大成交股中，恒基地產（012）、恒基發展（097）同中華煤氣（003）都上榜，加埋有5.8億元。恒地斥55億私有化恒發，每股作價7.35元，高過1年來嘅平均價，對得住小股東有餘。
通常在經濟和股市低潮之時，大股東都會作出對公司未來發展有利嘅部署；四叔今次出招，大有可能認為經濟已接近見底，正是「此時不做，還待何時」，加上李嘉誠亦不停增持長實（001），呢兩位「大孖沙」咁積極，應有一定啟示。
tom.com（8001）第3季蝕4414萬元，雖比上一季的蝕5000萬元為少，但略比市場預期的多，期內營業額4.52億元，比第2季上升9%，而今年首3季已有EBITDA盈利1100萬元。由於tom仔業績未有帶來驚喜，股價料在2元之下整固，暫難突破。
無論聯儲局減息與否，低息期仍會維持一年半載時間，高息股仍係中線投資主流，如恒生（011）、六福（590）等俱可選取。
郭兆誠