港股昨日回跌65點，跌市中，銀行類獨俏，渣打（2888）升2.75元，恒生（011）升75仙，但中銀（2388）則微跌5仙。
大銀行有勢，冇理由「賴」低隻中銀唔去。中銀遲吓成為恒指成份股嘅機會好大，𠵱家個價8.10元，仍然低過7月份上市8.50元招股價，上番去招股價，係好實際嘅期望。中銀抵買，自然要揀啲中銀Call輪玩吓。
中銀Call輪唔使左揀右揀，1隻9462搞掂。隻輪現價12.1仙，溢價4.8%，槓桿率6.7倍，明年7月先到期，大把時間，咁嘅數據夠晒靚。呢兩日，每日有成1億份易手，而發行量只不過4億份，咁嘅成交代表隻輪好多人參與炒賣，低買高賣者大不乏人。其他中銀輪，唔係成交太疏，就係溢價過高，可以不理。
中國電信招股條件改變，本來對電訊股利好，但中移動（941）則因為回吐而跌35仙。吼住中移動，再跌些少之時，博相關Call輪。
中移動Call輪第一主角係9532，數據合理，現價16.5仙，等見15至15.5仙上車。第二主角係9526，溢價同槓桿率都高啲，現價15.6仙，等見14至14.5仙上車。兩隻輪都易買易賣，啱做短線。
章盛