恒基地產（012）及恒基發展（097）突然雙雙停牌，公司話要進行企業行動，市場傳出係資產重組或私有化。
近期股市不振，唔少股份嘅股價遠低於資產淨值，觸發大股東伺機以低價將優質資產據為己有，美其名就係給予股東一個高價套現機會。不過，有人肯私有化公司，總好過讓港股變成死水一潭，不論私有化價格是否合理，至少反映大股東認為股價低殘，未能反映資產價值。此類股份風險甚低，投資者不妨在市場尋寶。
繼恒隆系、新世界系及德祥系重組之後，市場估計長建（1038）及港燈（006）亦可能進行重組。不過阿虎就唔相信和黃（013）會畀現金私有化長建及港燈。
恒基系今次重組，可以一舉兩得，因為市場上出現咁多重磅實力股，私有化恒發可以空出一個恒指成份股席位，而恒發亦可搵個光榮退出藉口，唔怕到時俾人踢出局咁失威。
超大現代（682）發生帳目問題後，管理層講明唔會回購支持股價，但噚日卻披露在11月4日以1.17-1.21元回購402.6萬股，而近日股價亦告穩定。黑客話，超大手頭現金達10億元，若動用20%回購股份，相信都可以托住股價一段相當長時間。
比亞迪（1211）噚日一度下挫8%，跌穿15元心理關口之後，急墮至14.50元，其後有大戶入市接貨，抽回15.05元收市，成交增至6855萬元。到咗呢個地步，比亞迪重有人肯接貨頂價，真係難得，但睇走勢後市仍會向下，趁重有人肯接貨，應該把握機會走貨。
阿虎