英皇娛樂老闆楊受成今年頭頭碰着黑，適逢今年英皇三周年，決定搞慈善演唱會沖喜，昨日英皇群星雲集記者會，大部份人均穿上紅衫示人。對於張栢芝日前怒斥要「打擊楊受成個仆街」，陳奕迅和容祖兒等人紛紛護主，指《東周刊》事件不應與老闆楊受成相提並論。
英皇娛樂老闆楊受成今年可謂頭頭碰着黑，先是謝霆鋒妨礙司法公正罪成後又要覆核刑期，旗下藝人羅文過身後，喪事亦諸多是非，而最新鮮熱辣的則是楊受成任大股東的《東周刊》因刊登某女星被強迫拍下的裸照而宣布停刊。在此風雨飄搖之際，英皇昨日宣布聯同無綫和東華三院於下月七日在紅館舉行「英皇3周年慈善演唱會」，眾星更穿紅衫實行沖喜一吓。
昨日的記者會楊受成並未有出席，英皇高層霍紋希強調楊受成並非怕麻煩而不出席，而演唱會當晚他一定會到。日前張栢芝曾指名道姓怒罵楊受成，英皇旗下藝人陳奕迅、容祖兒、Twins、王傑和三T等，昨日紛紛表態護主，異口同聲指《東周刊》雖然有錯，但事件與老闆楊受成無關。期間英皇高層霍紋希和甘菁菁等人均表現緊張，一路旁聽眾星與記者對話，以免有人不小心講錯說話。
容祖兒說：「可能佢（栢芝）抑壓咗好耐，我自己好同情佢，但喺我心目中，楊生絕對係一個好老闆，我覺得冇乜需要去安慰楊生，我會做好自己，唔使公司擔心。」
陳奕迅則指楊受成承受了很大壓力，他說：「我唔知栢芝講乜，我唔係佢，唔知佢嘅感受。呢啲嘢唔關老闆事，佢好多嘢做，唔止娛樂，重有金融、投資咁，好多嘢搞，唔好拉埋佢嚟講，佢呢排受嘅壓力都幾大。」
王傑則說：「楊生呢排憔悴咗好多，希望件事快啲過。《東周刊》好唔啱，我都識得女事主，我好愛護同支持佢，至於張栢芝，佢做乜有自己嘅權力，但佢只係細路女，好難怪佢，錯就梗係錯，但係唔可以一次過判佢死刑。」
至於Twins的成員蔡卓妍（阿Sa）亦說：「爆粗唔好，亦唔好公開咁講，雖然有言論自由，但做藝人好多人望住，而且呢件事唔怪得老闆㗎！」
正備受力捧的三T也七嘴八舌地為老闆講好話，Mandy（蔣雅文）說：「《東周刊》係唔啱，但老闆已經做咗負責任嘅表現。」Yumiko（鄭希怡）則說：「張栢芝講乜有佢嘅自由，《東周刊》有一定程度嘅唔啱，但唔可以拉埋老闆嚟一齊講，唔可以賴老闆。」
而在記者會現場，眾歌手分成紅、白兩組玩遊戲，容祖兒玩蓮步舞時，胸部撞倒橫桿致未能過關。記者笑言容祖兒身材變凸出時，她說：「今日着白色衫，所以凸顯咗啲，呢個年代唔需要咁，但天生我才必有用，我可以做奶媽㖭！」
Twins亦無厘頭以胸部作話題，阿Sa說：「我噚晚睇電視，原來我屬於假平胸，即係彎低身個胸大過企喺度，我聽人講着咗矯形內衣32A可以變34C，不過我一定唔做代言人，因為我驚要影嗰啲相，傳咗出去咪死！」
英皇方面表示，今次演唱會命名為「群星致敬羅文金曲獻唱會」，眾歌星到時都會演唱羅文的歌，容祖兒更表示有意以羅文過往的造型亮相。
採訪：胡比、汪正文 攝影：陳志嵐