近期民企股唔掂，莊家股又唔成氣候，經紀黃就話，不如玩吓紅籌國企，分分鐘有意外收穫。
經紀黃推介中國鋁業（2600），佢話雖然股價已經由谷底0.72元，反彈至噚日0.97元收市，累積升幅唔細，但歐資大行只係推介咗一段短時間，睇嚟班大芬重未買齊貨。
中國鋁業由美資大行幫手上市，自從保薦人轉軚話唔睇好，在出咗業績後，股價真係好肉酸，但怪就怪在近兩個月開始有歐資行唱好。
經紀黃話，呢班歐資大行中，好多分析員都係在海外浸過鹹水嘅歸僑，佢哋舊年靠推介民企食胡，但今時今日，民企股令人怕怕，似乎都係國企紅籌較為穩陣，所以唔怪得佢哋會大力唱好中國鋁業。
富昌國際（916）噚日開市中途突然停牌。經紀陳話，其實冇乜特別消息，只不過近兩日成交突然大咗好多，比較礙眼，所以俾人將軍。
慕容小初