美國有一間龐大商業信貸、營運資料公司，叫做Dun&Bradstreet，中文譯做鄧白氏。好多銀行調查客戶嘅資料，第一個步驟都會問鄧白氏攞基本資料，所以呢間公司嘅生意好唔錯，從美國到全世界，佢都霸住市場。
顧問K呢日好空閒，冇客仔上門，下午瞌眼瞓之際，電話響起。一位女士話做調查，想update一啲公司資料，例如地址、電話、傳真、電郵等等，顧問K問佢：「你係邊間公司？」答：「鄧白氏。」哦，係大公司，冇所謂啦，問乜便答乜，點知答完第一條就冇晒癮，顧問K覆述一問一答畀左丁山聽：
問：「公司地址？」
答：「大馬路XX號YYY室。」
問：「大馬路即係英文邊條街？」
答：「Queen'sRoadCentral。」
問：「請問點串？喺邊個區？」
答：「咪Central囉，你自己串Queen's啦。」
問：「即係邊個區呀？」此時顧問K懷疑對方係從廣州或深圳啲後勤支援中心打嚟嘅，於是問番轉頭，對方先至話自己係做兼職嘅，辦公室喺荃灣葵涌區，顧問K已經冇心機答落去，因為佢唔抵得香港人連Queen'sRoadCentral喺邊個區都唔識就做調查，調查員唔識，鄧白氏咁大間公司都應該畀啲訓練啩？好多人話香港教育水平低，顧問K聽到啲調查員係咁嘅水平，肉都緊埋。