碧咸家人單俾人計劃綁架案，畀人覺得英國足球員人身好唔安全，但估都估唔到，呢件事又會搞到阿仙奴中場龍格保要去少啲夜街。
龍格保咁嘅決定，主因係費事成為歹徒嘅目標，聽落好似言之有理，但係我求大俠諗諗吓，覺得有啲唔對路；大家試諗吓，龍格保嗰啲百變五顏六色頭髮，日頭喺倫敦條街度有邊個會睇唔到，咁即係話，阿龍哥你要人身安全嘅話，就一定要搞到個頭普普通通，咪整色整水，搞到個個認得你，咪盞引人犯罪。
話時話，我求大俠一直以嚟都信阿龍哥為個頭嘥唔少時間，而佢以前個光頭Look應該係最方便打理。或者去少啲夜街可以令佢有更多時間去整個頭，但千祈唔好唔記得，打好啲波先至係最重要，而唔係成日掛住個頭。
有邊個唔知巴西隊教練呢個職位係燙手山芋，史高拉利走咗咁耐都冇人肯接棒，而遲啲友賽南韓時如果重未有教頭嘅話，成何體統？結果薩加奴突然間話都係唔退休，走番出嚟帶隊。我求大俠好欣賞佢呢份勇氣同熱愛國家隊，但係由呢件事可以睇到，教巴西呢班難以馴服嘅球員，真係少啲來頭都唔掂，如果薩加奴遲啲唔教嘅話，就真係要巴西隊閉翳啦。
安歷卡最近嬲咗曼城領隊基瑾，事關基瑾以要踢周中聯賽盃為理由，唔畀佢返去代表九八年世界盃冠軍隊法國，同馬賽踢慈善賽，但係心水清嘅球迷一定知道，安歷卡根本就冇份踢嗰屆世界盃，又未效力過馬賽，真係名不正，幾時輪到你上陣。我求大俠就話，安歷卡你不如留番啲力，喺周六大戰曼聯時搏殺好過啦。
十月中嘅國際賽唔單止影響好多歐洲強隊嘅往後成績，連一啲季初以來畀到人一啲希望嘅中型班球隊都成為受害者，好似英超聯嘅米杜士堡咁，連埋周一輸畀紐卡素後，最近三場聯賽只攞得一分，立即跌返落去聯賽中游，而最大劑嘅係後衞主力基度爾連續兩場變紅牌阿姑，可能要停賽六場，相信米杜士堡之後都幾難打，波友們，捧米杜士堡對家係時候啦！
紐約人保持咗接近十年、連續四百三十三場主場爆滿嘅輝煌紀錄噚日終於斷纜，紐約人同一日亦苦嘗季初四連敗滋味，雖然話球隊冇咗主將史比維爾及傷兵滿營令戰力大減啫，但成績差成咁，唔「趕客」至奇，你估啲NBA門票好平咩。其實乜嘢紀錄都會斷纜，紐約人只要之後打好啲，擁躉自然會返嚟啦！