雖然最近大陸民企頻頻出事，但有危必有機，大陸始終商機無限，所以總商會噚日喺會展舉行「中國商業會議」，中銀總裁劉金寶、AT&T中國總裁高伯樂、中國富豪劉永好、聯想執行董事馬雪征等猛人都有捧場，主人家鄭維志、翁以登好鬼忙。
其中一個討論會係講金融投資發展，講者包括陳智思、彭如川及電盈副總裁袁天凡太太李慧敏，袁太七九年加入滙豐中國業務部，九四年升到部門副總裁，今年先調任企業銀行業務助理總經理。講到香港前景，港交所中國發展及推廣高級總監彭如川話，由書店嘅規模已經可以預測未來，內地嘅書店大到叫「書城」，香港冇得比；陳智思亦認為香港有嘅嘢，大陸遲早學到；只有袁太持異議，對香港好樂觀，並斷言五年內大陸嘅資本市場成熟程度都比唔上香港，八方今次希望係袁太啱。
傳真︰2623-9278
電郵︰