早排，日產Prairie一輪減價風潮過後，亞Mark有幸同佢哋嘅老總ChiuSir聚頭，言談間知道代理方面，正部署緊明年嘅新車大計。惟早前面世嘅第2代全新Cube，可能有前車可鑑嘅關係，上一次抵港叫好不叫座嘅緣故，睇嚟佢哋會引入嘅機會不大。然而，上星期亞Mark趁有空，曾到東瀛逗留咗三數天，並響新一屆東京車展會場上，有機會近距離接觸過部新款Cube，發覺部車跟上一代好唔同；方匣子造型既貫徹Cube嘅名字外，重要來得更見個性，大可跟新版March分庭抗禮，取悅不同用家。再者，新Cube造工精細設備齊全，車廂空間既闊落多變，而一台新加入嘅1.4公升直4偈（馬力98匹），輸出數值更較上一代1.3公升型號（馬力85匹），有過之而無不及，若然車價合理的話，相信亦不乏時下一班型男索女嘅捧場㗎！