好耐冇聽到和黃前大班Simon馬世民嘅消息，噚日喺金鐘太古廣場間上海飯店，巧遇Simon同佢太太Jennifer，聽講佢哋今次為做善事專程返香港。
原來Simon兩夫婦同香港癌症基金會主席Sally羅莎莉係相識逾三十年嘅好朋友，Jennifer曾任基金會行政委員會嘅委員。
馬大班以前寫咗本書《SimonMurrayLegionnaire》（中譯──法國外籍兵團），記述佢當年從戎的故事。幾年前佢資助美國導演MartinHuberty將書中故事拍成電影，為咗幫基金籌款，前晚安排喺香港會展放映一場，請班達官貴人睇，為基金籌咗二十五萬大元。
講開馬世民，當然令人想起佢舊老闆李嘉誠，前晚場戲雖然超人冇去睇，但係小超人李澤鉅兩公婆都有去。特首就去咗酒會，董太唔舒服睇咗一陣早走。陳四萬同老公、煲呔夫婦、李國寶夫婦都係座上客。
至於套片，大家應該冇乜機會睇，因為馬大班冇打算再放映，所以不妨講吓古仔。馬世民十九歲時，為博女友──即現時太太嘅歡心，想去當兵，點知祖國唔收佢，於是跑咗去巴黎，加入法國外籍兵團，派咗去阿爾及利亞駐守。馬大班好勤力寫日記，將五年嘅從軍生涯寫成書，𠵱家重拍成電影，扮佢個男主角叫PaulFox，不過，冇戲睇，邊個做都冇所謂啦。
傳真︰2623-9278
電郵︰