身為纖體代言人嘅張慧儀，噚日出席「減肥堂」全方位任影記者會，展示佢減肥之後嘅身段。個記者會講明係全方位任影唔「褸」，所以着住粉紅色連身裙嘅張慧儀都好大方，應記者要求左轉右轉，就算唔同角度影埋去佢都唔嬲，身邊嘅工作人員，亦都冇遮住張慧儀。唔似早排有籮霸之稱嘅韓君婷咁，喺纖體記招上面閃閃縮縮，又有幾個工作人員圍住佢，唔俾人影佢個patpat。
不過張慧儀始終冇着泳裝亮相，好難比較佢同韓君婷邊個身材正啲。
韓君婷曾經自爆如果肥一磅就要賠番十萬蚊畀纖體公司，咁張慧儀同「減肥堂」簽約又有冇呢啲規條呢？佢話：「冇呢條規條呀，我同纖體公司互相信任，況且我遲啲重要拍劇，自己都唔會自暴自棄啦！」咁又係，如果多啲嘢做要見人，自然要keep得弗啦！
邱澤早排去咗日本，幫當地一隊新組合siren所唱嘅新歌《我在這裏》拍攝MV，拍攝期間導演臨時叫邱澤除咗件上衣，趴喺滿布樹葉嘅地上，好彩邱澤喺台灣讀體專，身形十分弗，所以導演都好滿意！邱澤自己亦話好開心可以做到今次MV嘅男主角。
最近喺深圳嘅鑽石廣場外面，掛咗一幅印有陳曉東同張栢芝肖像嘅大型海報，重話佢哋會喺今個月十號一齊同啲歌迷見面。不過噚日東東同栢芝嘅經理人公司都發出聲明話冇咁嘅事，佢哋都話唔會出席，而栢芝所屬嘅中國星高層李小姐重話：「嗰個商場係有同我哋傾過，但係我哋已經推咗，因為栢芝冇期。」
台灣人氣組合F4幾位成員，噚日喺台北出席咗《流星花園2》嘅記者會，成員之一周渝民早排同學校申請復課，不過返咗學兩個月，仔仔又俾人發現經常缺課，重超出學校嘅規定，但係學校冇懲罰仔仔，於是有啲同學就覺得唔公平。仔仔嘅經理人江一朋話，其實公司都有為仔仔計好佢到底可以請幾多日假，而當仔仔要開工嗰陣，江一朋都有勸佢要問同學借筆記同溫習功課。
張鎧潼、陳司翰同周永恒，噚日喺海運大廈出席「自然基金海下灣海洋保護展覽暨魚牌掛樹典禮」。提起海灘污染問題，張鎧潼話：「我試過喺香港海灘游水，見到有嚿嘢浮喺水面，我咪執起佢囉，點知原來係屎，好彩冇擘大個口。」