多部林寶堅尼Diablo及蓮花Elise跑車，響剛過去嘅星期一齊集中國珠海國際賽車場，參加咗由代理商嘉信汽車所舉辦嘅同樂日；當日各參加者不但可以體驗到落場嘅滋味，平時難得一見有咁多部林寶堅尼同蓮花跑車響同一場合出現嘅情景，亦令人印象難忘，今日就不如一齊嚟睇吓當日嘅盛況啦！
記者、攝影：麥朗
當車群響早上駛達賽車場時，大夥兒已急不及待排隊出Track，秩序良好；而林寶堅尼Diablo及蓮花Elise就分成兩批輪流試圈，玩咗足足一個上午。午飯過後，首先一齊嚟影番張大合照留念，跟住又再落Track體驗一下喺賽車場上玩車嘅滋味，期間更混合兩款車同場試跑㖭！然而，由於今次同樂日純屬玩樂性質，並非常注重安全，現場所見各參加者都好穩陣，無乜特別嘅驚險鏡頭出現。難怪不少參加者都大叫好玩，重話如果下次再有呢類活動的話，都會參加啦！
蔡先生
駕駛車輛：林寶堅尼Diablo及蓮花Elise
響珠海賽車場玩過幾多次：3
意見：喺珠海賽車場呢類賽道，其實揸蓮花Elise會較林寶堅尼Diablo好玩好多；因為佢車仔細細又輕之餘，最重要係有類似小型賽車嘅操控表現，真係好好玩㗎！
武哥
駕駛車輛：林寶堅尼Diablo
響珠海賽車場玩過幾多次：1
意見：雖然係第一次響珠海賽道上駕車，同埋純屬玩樂性質，但已經覺得好好玩，好有賽車Feel；加上以前有玩開小型賽車，響珠海賽道上駕駛自己嘅林寶堅尼Diablo，唔係話一件難事，但可能始終係第一次玩，未熟習環境而已。