長實噚日又搞泓景臺三期記者招待會，正當趙國雄興高采烈咁，喺模型前面sell緊個會所幾咁巴閉嘅時候，長實前朝重臣周年茂突然殺到睇示範單位，老趙就以招呼老記為重，搵個馬仔招呼茂哥。可能少見周生蒲頭，班老記一窩蜂衝埋去同佢打牙骱，搞到老趙面色都變埋。
公關大員當然醒水，即刻狂拉老記歸位。周年茂亦唔想搞串老顧主個場，粒聲唔出咁繼續參觀，對老記嘅提問無回應，之後重靜雞雞走咗。
另外，由於老趙鍾意玩車，今次泓景臺其中一個示範單位就以車做主題。蘭西發現車形BB床個車牌係CK008，初頭諗極都唔明，因為長實上市冧巴係001嘛，之後有高人畀咗個提示，就係「閉門一家親」嘞。即係CK幕後揸Fit係老竇李嘉誠，008（電盈）就係楷仔話晒事。
本地廠家持有嘅將軍澳富寧花園十七號地舖，再次招標，下個月十八號截標，估計市值三千萬元，每呎唔使二千。間舖3月曾經招標，當時估值五千萬，八個月後，估計低咗四成，睇嚟有地鐵並非樓價抗跌靈丹。
負責招標嘅中原潘榮德話，間舖萬五呎，以前由酒樓租用，及後又由老人院承租，但係因為地契唔准住人，惟有交吉放售。
規劃署為了保護山脊線及維港景致，年前展開城市設計指引研究。城規會陸續在涉及區域的分區大綱圖，加入高度管制的條款，某些發展中地盤難免受到影響。規劃署昨日同蘭西講，城規會並非有意刁難地產商，更不是剝奪私人財產，只是為了保護山脊線及景致。
另外，地政署指出，發展商申請修改地契時，分區地政處除將分區計劃大綱圖內的指引列入該幅土地，亦會諮詢政府部門意見，加入合時指引。申請人可在特定的時間內提出反對。
吹咗好耐嘅救市措施，稍為有啲眉目，物業市場即刻有生機。美聯翁鴻祥話，近排多咗投資者睇寫字樓，噚日上環信德中心及金鐘力寶中心，就先後錄得成交。
翁鴻祥話，力寶中心（圖三）二座廿三樓十一至十二室，2016呎，成交價715萬，每呎3547元，創新低。信德中心西翼1410室，1440方呎，成交價417萬元，每呎2896元。租金回報率約5厘，買家都係投資者。
景愉居係北角半山天后廟道十幾年嚟，首個提供大單位嘅新盤，聽講就快賣得嘞。個盤喺正名校庇理羅士女中隔籬，前身係兩幢舊樓，十年前分別由中資武夷集團，即係筲箕灣峻峰花園發展商，同雷允上藥品雷氏家族購入。兩大業主近年傾掂合作重建，落成後分樓。武夷集團分得共二十五個分層A單位同兩個複式，全部放售。雷氏全數B室同十七樓A室共二十七個分層同兩個複式，其中二十五至三十二樓將會放租。市場消息透露，1539呎嘅分層每呎賣五千五蚊，入場費670萬，而2422呎嘅複式，呎價去到六千八。
蘭西
電郵地址：