上月本報報道羅文親友透過中間人向城中富豪劉鑾雄商借現金周轉，引起連串風雨，劉培基質疑中間人玲姐只是羅文歌迷，哪有甚麼資格代羅文家人借錢。昨日玲姐終現身交代事情始末，表示向大劉借錢一事，是阿東先向她求助，她亦知會了劉培基、Terry和羅文家人，劉培基稱不知情，顯然他的誠信有問題。
本報上月二十七日報道羅文親友因為需要現金周轉，透過中間人向城中富豪劉鑾雄借錢，但錢未借出已引起連串風雨，沈殿霞、鄧光榮、劉培基和羅文胞姊先後否認，其後羅文生前助手阿東承認對事件知情，並透露向大劉借錢的中間人是玲姐（即黎明契媽）。
劉培基隨即稱玲姐只是羅文歌迷，質疑她有甚麼資格替籮記家人向劉生借錢，並促請玲姐交代事件。昨日玲姐現身跑馬地一間餐廳向記者交代事情始末，她強調並非想任何人對事件負責，只是講出真相。
玲姐昨日說：「我同籮記相識二十年，亦係羅文製作公司嘅合夥人同董事，間公司成立咗十六、七年，如果我係籮記嘅普通fans，籮記點會搵我做合夥人？
「籮記十八號過身，銀行戶口即時遭凍結，二十四號阿東嚟搵我飲茶，話錢銀周轉有問題，佢話我應承過籮記會幫手，而楊生（楊受成）已經要攞咁大筆錢出嚟，佢唔好意思再開口。」
玲姐續說：「喺九月份，我叫劉生（劉鑾雄）買籮記層樓，佢冇應承，但話如果錢銀有問題可以隨時搵佢。所以我第一時間就諗起劉生，我喺阿東面前打電話畀劉生，劉生話冇問題。我叫阿東當晚將件事同籮記屋企人講。
「到咗星期日，件事俾傳媒報道咗出嚟，劉培基打電話畀我，我將成件事講咗畀佢知，佢話如果記者問起，叫我唔好認。當日我亦同籮記家姐、細妹飲茶，將件事講咗畀佢哋聽，我都有打電話同Terry講。成件事我對得住籮記，我冇任何得益。
「我同劉培基唔係深交，佢可以唔同意我嘅做法，但係佢嘅誠信有問題，佢唔可以話唔知呢件事！但𠵱家有人指名道姓叫我唔好逃避，我惟有出嚟講出真相，否則俾人以為我借籮記名義去呃錢，人哋會懷疑我嘅人格。」
據知事情發生後，籮記身邊部份人視玲姐如陌路人，她說：「唔緊要，今次件事，我學識好多嘢。」至於籮記十多萬住院費用、司機的遣散費和寓所的十多萬維修費是否已付清，玲姐已沒有理會。