提到地下連花園單位，大家係咪諗起啲低密度住宅呢？不過，好多人都唔知原來市區高樓大廈都有呢類單位，唔係淨得連平台或天台嘅空中花園單位㗎。最近西灣河鯉景灣就有一宗咁嘅成交。
利嘉閣地產鯉景灣分行經理朱漢斌話，鯉景灣成個屋苑只得兩座有地下連花園單位，就係觀景閣同觀海閣，夾埋得八個。啱啱賣出嘅係觀景閣地下B單位，面積769方呎，花園326呎，成交價220萬，每呎2861蚊。
聽講買家喺呢區都睇咗好耐樓，咁啱見到呢個單位放售，業主又肯由250萬減到220萬，所以就決定買。
朱漢斌講，除咗呢個單位之外，屋苑重淨番一個放盤，係觀景閣H單位，862呎，花園大啲有1105呎，但叫價要360萬。
既然啲單位咁少，蘭西好奇問對上一宗成交係幾時？答案係2000年7月，觀海閣地下A室，862呎，花園1105呎，成交價405萬元。
中原地產九龍總行搬去尖沙嘴港威大廈第二座，蘭西早前都有提過，日前收到佢哋嘅請柬，今日五點半舉行開幕酒會，認真大陣仗。不過之前重有兩場，頭一場喺中午，開記者會講九龍豪宅市道，第二場就喺三點半，同啲好友傾閒偈。以一姐劉瑛琳嘅人面，唔使講一定有好多發展商老友、熟客仔同朋友畀面祝賀，一日搞三場派對，少啲精力都唔掂。為咗沖喜吓個新場，辛苦啲都值得嘅。
美聯噚日舉行月會，竟然見嘉里建設朱葉培同吳美珊出現，原來此行係頒獎畀美聯。
美聯營業董事布少明話，因為佢哋促成荃灣寶雲滙第一宗成交，而頂層Barry'sLaurel，至今唯一一宗成交都係美聯成嘅。所以嘉里咪頒個「寶雲滙首宗成交獎」畀佢哋。布少明重話，佢哋代理大豐有限公司嘅粉嶺嘉兆軒，兩個禮拜賣出八成，發展商周日晚設宴慰勞佢哋，使費都成五位數字㗎。
嘉里借機透露，大埔滌濤山今個禮拜三或四會有最新促銷策略公布，即係話又有生意畀大家做啦！
雖然深圳嘅住宅新供應好多，連國務院總理朱鎔基都話有過熱嘅迹象，但二手現貨市場就好似冇乜受影響，原因係買家可實地了解，放心好多。所以戴德梁行嘅物業報告話，就算係新盤供應最多嘅華僑城一帶，二手價都幾穩定，每呎418到557蚊（人民幣，下同）。
羅湖區嘅百仕達花園，一個1281呎毛坯房，呎價617蚊。而福田黃埔雅苑（圖三）1152呎精裝單位，呎價682蚊。
今年第三季租務表現平穩。租金最高係福田東海花園，呎租七個四，南山錦綉花園最平，都要兩個六。
新地嘅西半山寶珊道1號豪宅終於有現樓睇嘞，不過暫時唔係人人都睇得，能夠先睹為快嘅斷估都要有十億八億身家至得，因為響今個禮拜五開放嘅現樓單位，正係全幢最貴重嘅二座頂層5108呎相連單位，市值至少八千萬。
發展商叫班代理安排啲有意買相連單位嘅準買家逐個上去睇，間間代理都話自己有十幾枱客，但係時間有限，睇嚟精挑細選之下嘅合資格睇樓人士，身家都有番咁上下，即係一擲幾千萬買心頭好而面不改容嘅有錢人。
蘭西
電郵地址：