臨近年尾，唔少人都會選擇喺呢個時候搬屋，不過要一次過買晒全屋家具電器，都咪話唔肉刺，好彩遇着有家電批發商開倉散貨，由大型電器如雪櫃、洗衣機、抽油煙機、暖爐，以至電熱水壺、吸塵機、風筒、燉盅這類小型家電，統統以低於街價五成以下發售，而且全部電器屬原裝行貨，附有原裝保用證，唔使擔心保養問題，就算無心換電器，淨係買個$88的西施電飯煲都抵番晒啦!
記者：尹珊珊
攝影：伍慶泉
ImageKid：彰彰
開設於油塘的家用電器展銷倉，由今日起連續七日開倉，貨品包羅了各類型家用電器，以實用、慳錢為大原則，部份貨品更會低過市價七成發售，例如歐洲全自動洗衣機每部由$780起、抽油煙機每部由$380起、雙門無霜雪櫃由$950至$1,650、窗口式冷氣機由$890起就有一部，最適合準備要換新電器的買家。
要數全場最矚目的電器，當然是這個氣霸西施電飯煲，以超荀價$88發售，出街食餐飯都要這個價錢啦！而且這個電飯煲有齊西施煲自動保溫、唔黐底的兩大功能，最適合四人小家庭選用。
型號：氣霸HY-2138
街價：$488
開倉價：$88
貨量：30個
學老媽子話齋，冬天飲凍水又邊會有益，梗係要買番個電熱水壺看門口，就算平時用嚟沖吓咖啡奶茶都幾好。這個山崎出品的電熱水壺，容量有3L，除了可以煲水和保溫，重有翻滾功能，隨時隨地都有熱水飲，有埋水位調節可以防止煲乾水，底部設計亦相當特別，壺身可以作360o旋轉，夠晒就手！
型號：山崎SK-300
街價：$500
開倉價：$180
貨量：50個
曾經買過一種嘈到「蓬蓬聲」嘅風筒，朝早半夜吹頭都會嘈醒屋企人，樂聲牌這個標榜靜音的輕身風筒就無上述問題，試過即場測試其聲量，發覺的確比普通風筒寧靜，強度達1,500W，分有HealthyDry和Normal兩種熱度，強調以溫和熱力防止髮質受損，以後日日吹頭都唔怕頭髮乾過草啦。
型號：樂聲EH5941
街價：$220
開倉價：$119
貨量：30個
現代人貪方便，幾乎家家戶戶都有部微波爐，而且幾年前微波爐亦開始大跌價，不過減到$300有找，又的確較少見。雖然這款格蘭仕S404微波爐並無附設燒烤功能，但強度達700W，有不同熱度選擇，能夠配合烹調不同食物的需要，最適合要求唔算太高的單身寡佬。
型號：格蘭仕S404
街價：$900
開倉價：$290
貨量：20部
入秋後天氣逐漸轉冷，是時候準備一部電暖爐扺禦寒流。雖然市面上有不少價錢便宜的暖風機出售，但覆蓋範圍卻略嫌太細，又會影響室內濕度，導致皮膚乾燥，充油式暖爐開啟後溫度上升較慢，但熱力傳送均勻，覆蓋的空間亦較大，以前就話過千元一部，但𠵱家飛利浦一部1500Watt的充油爐，開倉價亦不過四百幾蚊，屋企細細哋都夠用。
型號：飛利浦HD3444
街價：$750
開倉價：$460
貨量：15部
除非你是乾洗店的忠實擁躉，否則搬屋時點都需要一部洗衣機。這部富士山全自動洗衣機，洗衣量有5Kg，一般兩人小家庭已很夠用，洗衣時左右旋轉達800轉，乾衣時更超過1,000轉，面板上的開關和程序鈕操作簡單、一目了然，輕巧的頂揭式機門又可以方便將衣服取出。
型號：富士山SDF-938P
街價：$2,380
開倉價：$1,090
貨量：25部
唔少人都會追求視覺上的享受，買電視梗係要愈大愈好，不過礙於銀両有限，唔係人人都負擔得起。這部國產製的康佳29吋電視機，具備麗音、國際線路，及後置重低音喇叭，兼有埋三年保養期，但價錢卻比同尺寸的日本牌子電視機平足一半有多，若唔嫌質素不及日本機，論價錢的確幾抵玩！
型號：康佳T-2969N
街價：$4,500
開倉價：$2,190
貨量：50部
別以為在秋去冬來的時候，便毋須添置冷氣機，事關每逢一轉季，都是冷氣機的減價期，唔少精明的消費者都會買番部留待下年用。這部飛歌牌t匹窗口式冷氣機屬名牌靚貨，已有一定的信心保證，而自動搖擺的送風功能，令風力能夠平均吹送至每個角落，但最重要當然是有埋五年保用及一級能源標籤，就連電費都可以順便慳埋。
型號：飛歌GPA-3078N
街價：$2,680
開倉價：$1,290
貨量：50部
老媽子平日煮飯咁辛苦，重要吸埋大量油煙，做仔女當然要送部抽油煙機盡點孝心。這部家榮華出品的超特強抽油煙機，每分鐘可轉動接近二千轉，將廚房裏的油煙一一抽走，再加上易拆式設計，方便清洗。
型號：家榮華GH2200W
街價：$2,390
開倉價：$890
貨量：30部
一般抽油煙機售價由千幾至二千幾蚊都有，這部天品超薄型抽油煙機開倉價只售$380，可謂名副其實的益街坊大特賣。不過別以為平就無好貨，這部「開倉王牌」一樣具備各種必須功能，再加上配備有超高密度的離心風輪，吸力特強，每分鐘有1,380轉，卻不會製造大量噪音，而且標榜超薄的機身只有525mm，煮飯時都唔怕會頂頭。
型號：天品CXW-128-2401
街價：$1,200
開倉價：$380
貨量：30部
家用電器展銷倉
地址：油塘茶果嶺道610號生利工業中心6字樓01室
電話：23479278
開倉日期：即日至11月11日，一連7天
時間：上午10時至下午6時
付款方法：只收現金及EPS，但可於送貨時才付足
送貨：除離島外均可送貨，收費視乎購買貨品，小家電約$20-$40，大型家電約$60-$80