我Apple姐一向好認同力不到不為財呢句說話，就好似近年積極推廣本地旅遊業嘅蘭桂坊之父盛智文咁，事事都親力親為。 太太夠細心 好似早兩個星期蘭桂坊搞嘉年華，夜晚舉行開幕活動，我下晝三點幾經過就已經見盛智文喺度打點，佢着到西裝骨骨咁喺啲吊車、鐵架中間穿插，指點啲大海報、燈飾點樣布置，行到一頭汗，攰都唔肯走。好彩佢太太夠細心，叫附近酒廊啲夥計搵張木櫈畀老公坐。點知佢坐都要坐正路口，睇住個大拱門點擺位，真係夠晒認真！