港股在政府即將宣布停止賣地、美國將減息及西岸工潮達成臨時協議3大利好因素刺激下，大升313點，收報9720，成交近54億元。收市後，市場再傳出香港IDD服務商調低致電中國IDD收費，直情係喜事一浪接一浪。跟住重有冇其他利好消息呢？似乎暫時睇唔到，但亦無特別利淡消息，後市估計橫行為主。
不過，有一件事大家要留意，朱總理警告國內經濟過熱問題，唔知係咪宏觀調控嘅前奏。若大家唔係善忘，94年中國的宏觀調控曾拖累香港經濟。當時中資在香港相當活躍，資金調回國內，對香港股市及樓市都有影響。不過，現時情況則有所不同，因為中資早就不活躍，照計唔會有資金需要調返國內。至於國內出現樓市泡沫，可能會迫使資金調來買相當低殘嘅香港樓，如果係咁，就真係正啦。
市場憧憬思捷環球（330）加入恒指成份股，噚日股價一度急升8%，但其後又急回，升幅收窄至4.8%收市，似有人正在出貨。事實上，就算思捷成為成份股，升勢亦難以持久，高價追入好易變成接火棒，若不能成為成份股，回吐壓力即時大增，只宜短炒即日鮮，不宜長期持有。
星虹（397）有異動，噚日升64%，收報4.1仙，成交金額則只有32.6萬元。公司新大股東用每股1.5仙買入公司16.66%股權，以噚日收市價計，帳面賺1.7倍。話就話有炒家想炒起隻股，不過成交咁薄弱，好難引人入局。幕後至少都要落多幾分本錢，將成交谷大，等散戶炒得安心啲。今時今日，咁嘅服務態度已經唔要得。
阿虎