恒指一升就係313點，市場憧憬今日政府托樓市有嘢噏，地產股當炒，相關Call輪郁吓升兩三成，早段攞貨嘅尾市已經有魚有肉，係唔係值得高價追貨，見仁見智。穩陣嘅做法係等回些少之時上車，又或者揀啲升幅冇咁大嘅Call輪埋手。
中信泰富（267）喺大紅籌中較為突出，高收17.20元，升60仙，末日Call輪9037（本月18日到期）升26%，9318重厲害，收6.5仙，彈升35%，明年1月到期，溢價11.1%，槓桿率26.5倍。追中信Call輪，9298最值得諗，收14仙，只升16%，夠晒長壽，明年6月到期，溢價12%，槓桿率12.3倍，有37球易手，好易買賣。正股始終唔算大動作股票，不過唔使望咁高，正股升上18蚊鬆啲，揸9298大概有3成半至4成利錢。
滙豐（005）升1.50元，跑慢過大市。恒指收9720，有機會遲吓上試萬點，重磅股如滙豐點都有份推動恒指上升。諗吓滙豐Call輪玩短線，快手快腳玩兩手，9395最啱，槓桿率勁（24.6倍），對正股變化反應敏感。計數揀輪，則可以揀9451同9391，溢價低好多，爆炸力同殺傷力自然低啲。
章盛