謝霆鋒早前因為串謀妨礙司法公正，被判履行社會服務令二百四十小時，據知霆鋒上星期五係第一日履行社會服務令，佢俾人安排喺港島一個義務團體，同其他被判履行社會服務令嘅青少年一齊髹漆。
霆鋒自宣判之後，一直深居簡出，佢個舊愛盧巧音前晚喺無綫電視城出席節目《機電群星智醒Show》錄影，對於霆鋒履行社會服務令做髹漆嘅工作，盧巧音話：「霆鋒冇打電話畀我，髹漆嘅工作好啱佢。第二時佢裝修唔使畀人做，唔使嘥錢。」
唔知霆鋒聽到後會唔會幫舊愛髹油，幫佢慳番啲裝修費？
英皇三T之一嘅Yumiko，佢前日因為有工作喺身，所以缺席演藝人聲討《東周刊》嘅集會。唔知係咪因為Yumiko同成龍傳緋聞，所以有好多次有成龍出現嘅場合，Yumiko都缺席。Yumiko前晚喺電視城參與節目錄影，佢話：「咁啱我有工作啫，我都係演藝界一分子，出席唔到嗰個活動都好可惜。」
前日有好多藝人去聲討《東周刊》，重講到傳謀道德操守呢個問題，咁啱葛民輝噚日就應浸會大學邀請佢去演講，問阿葛會講乜？係唔係講傳媒文化或者操守？佢就話：「我都唔知我會講乜，人問我就答，或者同在座所有大學生研究吓嚟緊六合彩開乜。」
宣萱噚日接受新城節目《娛樂一早》訪問，其間講到佢之前同羅嘉良嘅緋聞，佢笑住話：「我同佢一直都好似兄弟咁好朋友，拍劇時同佢做情侶，有時要拍咀戲都覺得好似亂倫咁㗎！𠵱家緋聞已經過去，我哋都唔使避忌。」宣萱唔同嘉良避忌，咁佢有冇諗過嘉良老婆嘅感受？
成龍喺前日演藝人集會度突然間將矛頭指咗去狗仔隊，其實今次《東周刊》事件同狗仔隊無關，而狗仔隊亦有好多堅料，好似吳綺莉大肚，都係俾狗仔隊影到先。馮仁昭就覺得某啲藝人唔好淨係識一味鬧狗仔隊，如果自己行為檢點，行得正企得正又有乜好驚？成龍大哥你話呢！