香港大學聖約翰學院噚晚張燈結彩，人頭湧湧。華燈初上，大家都忙着穿上黑色嘅罩袍，準備參加紀念九十周年高桌晚宴，一時間，時光好像倒流到亨利波特嘅年代。
聖約翰堂猛人如雲，宿友包括有兩松、兩楊、兩局長、一秘書長、一行會成員、未來白鴿黨黨魁等等。「兩松」就係前港大校長黃麗松以及噚晚嘅講者財爺梁錦松，細松返到母校，心情特別靚，猛話「好開心」；大松就更high，手舞足蹈話係都要同細松拍番張合照，留為紀念。
至於「兩楊」，就係兩位楊法官，楊鐵樑話自己在聖約翰堂唔係住咗好耐，另一位楊官係楊振權法官，坐陣上訴庭。此外，St.John's重出好多高官，噚晚有嚟嘅有阿松同學馬時亨局長，八方猛問佢啲部門減1.8%搞唔搞得掂，佢就話冇乜大問題。
另一位局長廖秀冬，就七點入席時都未見影，反而常秘羅范椒芬就嚟咗，八方笑Fanny咁靚，當年一定好多人追，點知Fanny猛耍手話「冇！冇！」佢笑話自己住八樓個時好曳，係樓上掟水袋，搞到架lift成日壞，原來羅范舊時咁壞，真係第一次聽。
其他猛人重有排數，政府統計處處長何永煊、衞生福利及食物局副秘黃碧兒、醫管局高層譚智媛、阿董老友名律師鄭慕智、現任行會成員廖長城及前行會成員王䓪鳴等等等。
（圖）黃麗松（左二）手指指，叫記者記得同佢和細松（梁錦松，右一）拍張合照，旁為港大校長徐立之，後為楊森。 陳亮華攝
傳真︰2623-9278
電郵︰