近排好多人詛咒拜仁係衰波，因為連埋輸畀不來梅之後，佢哋連續四場（包括聯賽同歐冠盃）讓亞洲盤波都香晒，同前排阿仙奴及皇馬一樣，唔信邪嘅可以繼續追佢哋，但係周中德國盃就要提醒大家，小心拜仁又令大家中伏。
對𠵱家衰到貼地嘅拜仁嚟講，呢個盃棄之不惜，況且對手係神經刀漢諾威，根本唔易哽。重有本周六佢哋嘅聯賽對手係勁敵多蒙特，我求大俠相信呢場波大過天，關乎拜仁教練希斯菲特同球員前途；拜仁死都唔好死呢場，否則真係千年道行提早喪都似。
我求大俠重要鄭重咁提一提大家，周中各國本土盃賽開戰，冇直播之外，亦冇人知嗰啲所謂強隊例如拜仁同曼聯會搵啲乜人去踢；直至開賽前上網你就可以知道一清二楚，所以識做啦，到時先至手起刀落，決定落乜錘，包有着數。
愛華頓領隊莫耶斯學咗費格遜懸紅吼實啲嗰招，叫球迷要幫手昅住十七歲仔前鋒朗尼唔好行差踏錯，免佢自毀前程，因為呢個新星前日又後備入替射垮列斯，令愛華頓升至第六位，真係唔講得笑。莫耶斯話報料費一百鎊，呢個價又真係同老費一樣，唔會學啲唔學啲，我求大俠都抵唔住頸要讚番句。
意大利南部多災多難，地震、火山爆發、失業率高企，總之就係冇樣好……咪住，原來南部唯一代表球隊里賈納重有好嘢，該隊日本球星中村俊輔
已經成為佢哋嘅救星。話說上個月印佢個名嘅球衣就熱賣一千二百件，而且一直收緊日本方面直播里賈納嘅轉播費，加上因為中村而得到嘅贊助唔少，令球隊仍然可以逆境中生存，所以可以大膽講句，中村真係可能係意大利南部唯一希望。
好多人話蘇超聯球隊實力懸殊，好多時有大手交易，我求大俠就唔知鴨巴甸領隊施哥夫達係咪認同呢個講法，但一定知道佢係姓賴，因為周日佢班波作客淨吞些路迪七蛋，讓到六球/六球半都重有得執。施哥夫達話慘敗主因係球員食錯嘢屙到軟晒。呢個原因確幾特別，弊就弊在鴨巴甸已經連續第十五次作客輸畀些路迪，唔係偶然啩，勇敢面對現實重好啦！
正如大部份香港嘅NBAfans一樣，我求大俠都係湖人嘅擁躉；之但係，季初呢啲強隊開高走低真係唔奇，尤其見到湖人波盤喺瘋狂追捧下由受讓變讓波，或者好似噚日朝少讓變多讓，都咪話唔驚。大佬，阿「禪師」教頭積遜都講到明冇咗「巨無霸」嘅湖人，預咗季初輸足七場；而且成季八十二場波咁多，輸幾場都唔怕冇得追。所以下次再捧湖人之前，真係諗真啲好。