一位讀者Alan來電郵話「遺失了訂購張五常教授大作──《經濟解釋》──嘅電話及聯絡方法」，問左丁山，可惜左丁山亦唔知，幫唔到你。不過，張大教授嘅著作素來暢銷，書局爭着要，你一定可以喺書局買得到嘅。
講起張教授，張教授就到。寫稿之際，有人送書上門，打開信封，內有張教授嘅便條：「余友黃貴權醫生，攝影大師也。其平生大作將於十一月十五日至二十九日於銅鑼灣中央圖書館地下全廳展出，勢必洋洋大觀矣。黃醫生委託我送給你這次大展的攝影全集──《詩影澄懷》。這是我見過的印製得最精美的攝影集。」
張教授本人亦係攝影大行家，好多人想排隊爭住畀教授影相，佢既然推介黃貴權醫生嘅攝影，豈敢錯過。呢本《詩影澄懷》用厚粉紙精印，厚二百二十七頁，分春夏秋冬四季，分類展出風景靜態，左丁山雖是外行人，一睇都馬上震攝，大教授為影集作序（中英文），情文並茂，理論（攝影理論）精闢，對攝影有涉獵的，不可不讀。張大教授於「走進物內才表達感情，是好藝術，不走進物內，對物體沒有親切的感受，就不能通過物體來表達你要說的話，有物體為憑的藝術，是要把自己感受到的物內情，傳到觀者那邊去。」睇黃貴權嘅《詩影澄懷》，大家就會領悟大教授之言。影集引用蘇軾《永遇樂》「明月如霜，好風如水，清景無限。」呢本影集嘅照片，「見山只是山，見水只是水」（大教授語），大家學嘢嘞。