上星期五停牌嘅香港葯業(182)，在停牌前好短時間內，由唔夠0.70元水平，乾升至0.85元。
消息原先話準備向一個芬佬配股，引入策略性投資者，但噚日同經紀陳傾開，佢話批股一事再次撻Q收場。
今次隻股復牌，唔知會否重演上次配股唔成，復牌股價急跌一幕？小初問經紀陳，係咪芬佬嫌價錢貴？經紀陳話唔係，應該係技術上細節講唔掂數所致，至於詳細情況佢唔係太清楚。
查實香港葯業早在10月初，已經停過一次牌話準備配股，但結果係不了了之。短時間內兩度配股失敗，除了帶來負面形象外，亦令人感覺公司十分水緊。
另外，近排股價一直乾跌嘅中華國際（1064），傳聞話隻股可能賣殼，但隻股噚日在冇乜成交下大跌8%，收16仙。
小初有啲唔明，賣殼通常要頂住個價同人講數，點解股價會向下？
慕容小初