逆市開新店，還要是貴價日式自助餐，老闆絕對是藝高人膽大！老闆重好有信心話：「就係睇準香港人鍾意食海鮮。」再加上大廚話：「有成40幾款壽司，重有三大主打龍蝦、蟹腳同三文魚卷，食得晒就話你好嘢！」既然大廚已下戰書，一於帶齊人馬攻陷整間店，睇吓點食番夠本啦！
記者；陳冰麗 攝影：陳智良
胃得一個，唔好好利用食番啲貴價菜式，今次自助餐之旅一定蝕底畀人，其實由訂位、揀嘢食以至食邊樣先都好有學問，其中只要謹記三招必殺食法，加埋兩大攻略，縱使畀$218食自助餐，唔單止可以回本，分分鐘重有賺㖭！
食到賺番本三大招數
2隻龍蝦箝＋8至9隻蟹腳＋三文魚卷
以平日晚餐價錢成人一位收$218計算，應先食波士頓龍蝦，一般來說外面酒樓要收$60至$80一隻，視乎重量而定，食兩至三隻箝已經回本三分之一；跟住要食的是蟹腳，在其他的日式料理店一般要$150才有八至九隻蟹腳，若你能夠食番相同數量，又回本一半有多。另外只要你食多幾款貴價壽司如三文魚卷，一般壽司連鎖店收你兩件價錢起碼要$20多元，食番四件已經要$40，加加埋埋食起來的價錢約$250，已經回本有餘。
2隻燒大蝦＋4件海膽壽司
若你是喜愛日式料理，如壽司及鐵板燒等食物，回本更容易，以旺角的鐵板燒店為例，一隻燒大蝦要收你$60-$70，只要食兩隻已經回本一半；再食矜貴海膽壽司，一般壽司連鎖店賣一碟兩件起碼要收$40，食四件左右，已經封了蝕本之門；再食落去已經有賺。
食埋甜品賺到笑
只要先用海鮮主攻法，封了蝕本門，然後留力主打甜品，肯定賺到笑。
這裏的甜品有二十多種，全部都在酒店常見的種類；若以外面日式餅店來計，一件Tiramisu要$30左右，而這裏的Tiramisu是出面一半左右，細細件不易飽。不過點飽都要食埋雪糕，因為是酒店自助也少見的芝麻雪糕、豆腐、綠茶雪糕，外面要$25一球，這裏是任食呢！唔夠喉的話，重可以來多個新鮮滾熱辣即做班戟。
攻略１
全店有成四百個座位，面積至少有萬多呎，全店有三分一位置接近擺放龍蝦、蟹腳、魚生同壽司的，想第一時間食到新鮮魚生同壽司，一定要爭取這個有利陣地。萬一坐在最邊緣的位置，就算畀你望到有新鮮魚生推出，行到去恐怕都被攞晒，分分鐘又要空手而回，所以訂位時最好要求坐近吧枱！
攻略2
據大廚話全店食物分類有壽司、海鮮、鐵板燒、熱盤食物、沙律、甜品及飲品等等。單是壽司已經有四十多種，其他食物款式加起來亦超過四十多款，若果想一次過試晒全部食物幾乎無可能！所以要緊守先後次序，首先搶攻海鮮三大主打，包括龍蝦、蟹腳、三文魚卷，其餘可試雞尾蝦、半殼帶子、常見的三文魚、油甘魚、吞拿魚、少見的綠貽貝等等。
TODAI
電話：23759883
地址：尖沙嘴彌敦道132號美麗華商場地庫1樓B1001-03號舖
LunchBuffet
星期一至五 12:00nm-2:30pm
成人$98 小童$68
星期六、日及公眾假期 12:00nm-3:00pm
成人$118 小童$78
DinnerBuffet
星期日至四 6:00pm-11:00pm
成人$218 小童$148
星期五、六及公眾假期 6:00pm-11:30pm
成人$238 小童$158
＊(65歲或以上老人跟小童同價)
醒目貼士：平日晚餐每位$218，不過只要你晚上9時30分後入座，就有85折優惠，食物款式依然一樣。另外，平日的午餐成人只需$98，款式沒有分別重抵食。由於價錢不包飲品，你可畀$18就可以任飲汽水，都算着數。