大市奄悶，但新股照樣排晒隊上市，究竟錢從何來？好似掛牌只有幾日嘅亞洲鋯業（395），之前由於市況淡靜，曾經因為圍唔齊飛而一度要延遲招股。聽聞收尾有人各自讓步，同埋搵到大陸客出錢出力，先至圍齊飛上市。
小初問經紀陳，雙方最終以乜嘢價錢傾成？經紀陳話佢唔係圍內人，所以唔多清楚，就算知道，為免阻人發財，亦唔會講畀小初知。
亞洲鋯業上市至今只有4日，股價一直高於招股價0.80元，首日最高見過0.93元，上周五仍收0.87元，但成交金額則只得百零萬銀。
經紀陳話，股價雖然企得好硬，但照計未散到貨，現時重係維持搓波仔嘅局面。小初亦見到幫手圍飛嘅證券行，成日掛牌出出入入。
聽聞「鋯」呢樣元素用途廣泛，可以應用於流動電話元件、陶瓷、化妝品、人造寶石、陶瓷顏料及防火物料等，但講真句，小初其實唔多清楚公司前景。
慕容小初