SUNDAY亦加入MMS行列，指定動作如下載各款MMS圖像、明星或卡通相片，以及電子賀卡就當然唔少得，但講到好玩就要數「私相簿」，用影相手機影完相之後，可經MMS將相片傳送並儲存在SUNDAY的網頁內，另外，亦可於網頁內執相，甚至落Order曬相都得，影完相唔止喺部手機睇咁簡單。
記者、攝影：招佩珊
SUNDAY網頁內的「私相簿」有5MB免費儲存容量，可經電腦或用手機以MMS將相片Upload上去，於網頁內用家可幫張相加圖案或加框，除了可Send番落部手機外，亦可以於網頁內進行落Order沖印相片或貼紙相，於超過470間7-11便利店、city'super、LOG-ON或iCare拎相，沖印3R或4R相片每張收費為$1.8。亦可直接去旺角銀城SUNDAY店即時上網印相。每次上載、下載或以MMS傳送相片每張收$3。暫時要於網頁內才可睇番相簿內的相片，經WAP睇「私相簿」亦預計於今個月內推出。
講到MMS當然包括各款公仔MMS、明星相片及電子賀卡的下載服務，每個MMS內容下載收費由$10-$20不等。於網頁或經WAP亦可下載7個不同種類的Java遊戲，好似有賽車、拼圖及跳舞機等，每款Game的內容下載收費及數據用量收費分別為$15及$5，即要$20才可下載一款Game。
網址：
查詢熱線：21138000