寶蓮寺「封山」事件雖然最後都擺平，但正所謂「佛都有火」，香港社會怨氣沖天已經係不爭事實，其實八方知道重有好多火頭，好彩未燎原已經有人救火，否則阿董二十四小時唔瞓都救唔切。
好似早前保險業界就差啲同政府反面，更有一個保險業協會老頂，出到聲話要鼓動會員上街遊行。因為實行保險中介人考試制度之後，做保險經紀要辛辛苦苦考試攞牌。前一排失業情況嚴峻，政府諗橋諗到頭都爆，卒之畀佢諗到一條橋，想設立一個"AssociateAgent"（見習保險員）制度，畀多啲未考到牌嘅新人入行，減低失業率。保險業界梗係反對，否則考到牌嘅從業員咪好唔抵？後來搵到立法會保險界議員陳智思同政府講數，一人讓一步，先唔使搞到連保險經紀都上街咋。
（圖）如果唔係陳智思出面擺平，可能班保險經紀已經走晒出街遊行！
傳真︰2623-9278
電郵︰