前日新澤西網隊嘅主將傑特因為用手踭撞擊溜馬後衞添士利，即時被逐出場，按NBA規例佢應該自動被罰停賽一場，不過噚日聯盟只喺罰咗傑特五千美金就了事，一改之前向湖人前鋒霍斯同帝王後衞基斯迪「大開殺戒」嘅嚴厲作風。我求驗客諗，如果今次主角換轉喺「火爆三郎」馬田，NBA肯定「冇面畀」，最少罰佢停賽一、兩場，殺一儆百。
無可否認傑特一向喺球場上嘅行為良好，佢所犯嘅錯亦非十惡不赦，輕判無可厚非；不過我求驗客覺得NBA應該要一視同仁，唔理佢係球星抑或新丁，都應該依法判決，咁先至係公平同公正。如果只要有啲名氣同貢獻就可獲得特殊待遇，咁同霆鋒撞車頂包案有乜分別？
近半年成績猛進嘅泰國網球新星斯里查潘，幾日後會獲祖國政府頒發「外交簽證」，以表揚佢喺網壇嘅成就，佢攞住呢個簽證就可以四圍參賽，做泰國嘅親善大使咁話。其實自從米高張老退後，亞洲都好耐未出過好似呢位泰仔咁勁嘅網球明星，希望佢繼續進步，唔單止為泰國爭光，重係亞洲之光。
拜仁慕尼黑響歐冠盃出局，開始有傳媒揣測教練希斯菲特離隊日子不遠，有德國報章重吹捧緊好幾個新教練人選，大熱門竟然係荷蘭人古列治㖭！我求大俠覺得都幾難有人信，一來就係人都知古列治領軍能力麻麻，二來德國人咁有民族精神，點會搵個外人嚟舞自己國家最偉大嘅球隊呀？唔通真係貪阿古生提倡嘅「性感足球」咩！
乜𠵱家啲比賽咁容易走咗啲球迷入場嘅？前晚英超聯曼聯同埋利物浦兩場波，又有球迷走入場搞事。其中曼聯嗰場，個球迷衝入場後就走埋去傑斯度攬頭攬頸扮friend，唔知傑斯係咪一時間嚇到呆咗，竟然唔反抗又唔走開！如果個球迷有武器喺身，拎把刀出嚟捅一刀點算？所以我求大俠舉腳贊成將呢啲害群之馬終身不能入球場睇波！
呢兩日涼咗加上歐洲嗰邊已經行緊冬令時間，深宵直播嘅波，我求大俠要用無比意志去抵抗睡魔，鬼叫大波癮咩！但前晚拉科對皇馬嗰場，兩隊都好似唔想輸兼夾無波入，悶戰一場，早知就錄低佢啦！三色台重慘，好日唔直播，一播就播場悶嘢，唔怪得臨尾都要播上季巴塞對皇馬嘅精華去谷月尾呢一場直播啦！