出道咗五年嘅深田恭子，終於都二十歲囉！前日牛一嘅佢，特登着咗件鬼咁低胸嘅自製粉紅色晚裝，出席喺日劇《Remote》錄影廠搞嘅生日會。在場人士一見到恭子咁好肉地嘅身材，即刻群情洶湧，連劇入面嘅男主角堂本光一都話：「嘩！恭子真係靚到我唔夠膽直望佢！」
不過恕我大口羅拉out喇，雖然啲日本少女一到二十歲嘅法定成年年齡，例必扮到鬼咁成熟，好似恭子咁重戴咗條成一千萬日圓（約六十四萬港元）嘅BVLGARI頸鏈，又要當眾飲酒，但係恭子其實你得嗰二十歲啫，唔使咁刻意着晒低胸衫咁話畀人聽你大個女嘛？我羅拉就真係寧願睇番你以前得意可愛嘅樣囉。
可惜恭子唔止要用打扮嚟表示佢唔再係細路女，重講明以後都唔會自命公主，恭子話：「雖然我以前話二十歲前要嫁，但可能我真係識諗咗，𠵱家唔想結婚囉！因為我憧憬嘅王子，現實世界根本冇㗎！總之我一心淨係想做個好偉大嘅女優啦！」恭子呢個「唔嫁宣言」，唔知係咪有心講畀最近同佢傳緊緋聞嘅光一聽呢？