葉劉淑儀喺FCC舌戰余若薇、吳靄儀，態度十分強悍，直情係你有你講，我有我唔聽嘅款，令左丁山諗起《通勝》裏頭嘅〈稱骨歌〉之四両命：「平生衣祿是錦長，件件心中自主張，前面風霜多受過，後來必定享安康。」據《壹週刊》講佢嘅身世，葉劉氏喺未結婚前就一定受過無數風霜，但冇乜驚險，做官後平步青雲，現時梗係衣祿錦長享安康啦，不過要害之處係嗰句「件件心中自主張」，諮詢喎，當做騷啫，如果葉劉嘅八字計出嚟真係「四両命」，稱骨歌準確到震。
葉劉當日話意見書要睇質量，佢收到254份意見書，只有60份反對「基本法二十三條立法諮詢文件」，而且唔少反對者只係從《蘋果日報》剪下一張意見表，tickticktick（葉局長之言）；《蘋果日報》總經理廖建明好醒目，乘機賣廣告博宣傳，問葉劉淑儀：「我哋《蘋果日報》廣受歡迎，讀者眾多，將二十三條立法嘅訊息傳遍港九。的士司機、麥當勞夥計都睇到，佢哋用我哋張form嚟發表意見，有乜唔妥？」葉局長有備而來，即刻舉起張「蘋果意見表」，fing咗幾次，整個FCC在場人士都睇到，幫廖建明達成宣傳《蘋果》嘅目的，葉局長話：「我冇講質素或者唔妥，只係講一啲反對者tickticktick啫！」
若講「意見書質素」，贊成者亦有八股啫，睇吓愛國報紙就知啦，如果數意見書，不如叫全港市民投票好過！