賀歲片開拍在即，每天忙於四處睇景。戲中的一個場次需要一個小樹林，製片部叫苦連天。「導演，香港已經冇乜樹林囉喎。」製片拿着大相簿，一邊展示照片一邊說：「睇吓呢幾個啱唔啱？」照片中只見的所謂樹林只有寥寥幾棵樹，旁邊不遠處都是高樓大廈。
「元朗嗰邊唔係好多嘅咩？」我問。
「經已俾人斬得七七八八，變成爛地一塊。」製片答。
「咁烏溪沙嗰邊唔係有個拍攝勝地小樹林嘅咩？」我開始有點焦急，依稀記得以前曾在該處取過景，雖不太理想，但就手應該用得上。
「導演，你梗係好耐冇去過嗰頭，𠵱家莫講話樹林，草都唔多條，經已起滿晒大型屋苑，不過就好多都冇人住。」
另一個場次需要一個半山區的豪宅，於是大家像睇樓團一樣，一個接一個單位的去睇。坐在豪宅的大廳，透過落地玻璃看出去，覺得有很大的壓迫感。下面有很多很多的大廈，在這單位的腳下，即係這個單位的戶主應該比下面的人好環境，但回頭望一望，一樣有很多很多大廈在上面，那種感覺有階級性、競爭性，周身唔舒服。
拍戲好玩的地方就在這裏，很多平時沒有機會去的地方都可以去到，但想起重有幾個景未搵到，心確實有點焦。同事們，革命尚未成功，同志仍需努力，畀心機！