八方上周喺立法會見到白鴿黨主席李柱銘巧遇黨鞭司徒華，兩人嘅對話神神秘秘，華叔一見馬丁就話：「點呀，有冇睇過？」馬丁：「收到啦，多謝晒！」華叔：「滿唔滿意呀？」馬丁：「你出手，我點使驗貨？睇都唔使睇呀。」八方聽完一頭霧水。
原來馬丁籌備出一本叫做《普通人用普通法》嘅新書，其中包括解釋有關二十三條同普通法嘅法律概念，唔少文章喺《壹週刊》登過。不過，馬丁嫌電腦嘅字體太死板，書名想用書法題字，呢個係華叔強項，而華叔一聽係反擊二十三條嘅書，一口應承，話咁快已經起貨。
馬丁最想本書趕在佢十二月落莊唔做主席前完成，班黨員重準備為佢搞個簽名會，馬丁就驚到時冇人嚟會好瘀。講開白鴿黨大選，楊森已決定去馬問鼎主席個位、李永達同何俊仁為副；三劍俠上星期一齊去咗港島支部，呼籲黨員支持新領導層。
傳真︰2623-9278
電郵︰