皇仁書院噚晚喺會展擺咗近二百圍酒慶祝一百四十周年校慶，當然唔少得兩位舊生會永遠名譽會長，全國政協副主席霍英東博士同埋賭王何鴻燊博士兩位「皇仁孖寶」。
唔知係咪佢兩個都係晚會主要贊助人，大會特別安排呢對歡喜冤家同台向住班新舊QC仔演說，本嚟主題係舊日皇仁生活趣聞，點知霍老一揸住支咪，就苦口婆心向班師兄弟進行愛國教育，由總理遺囑講到八四年中英聯合聲明，又講鄧小平南巡同中國改革，連佢老哥當年起中山溫泉賓館嘅苦況都講埋，幸好佢話九七回歸時籌委會冇將皇仁個校名放入議程傾，所以保住個名唔使改。當年最大得益，霍老話就係冇停過運動，常踢足球，原來亞洲球王李惠堂都係皇仁仔。
接住到賭王講嘢，佢不失搞笑本色，一時又話自己讀書時大把錢，一時又話家道中落，要出貓博獎學金，總之屎尿屁嘅古仔都講晒，連昅聖士提反女仔唔記得扣褲鈕險被罰五蚊都講埋，真係非常夠娛樂性，贏得滿場掌聲。
（圖）因為澳娛事件搞到面左左嘅「皇仁孖寶」何鴻燊（右）同霍英東，終於喺母校一百四十周年校慶又再碰頭，客客氣氣握吓手。 仇志中攝
傳真︰2623-9278
電郵︰