郭富城（城城）噚日喺上海出席舒適堡健身美容中心嘅開幕典禮，大會重特別舉行咗「2002年舒適堡杯健康生活都巿鐵人慈善賽」，現場吸引過千名途人圍觀，場面墟冚。
大會為保城城嘅安全，特別安排咗六十名保安喺現場維持秩序，而城城自己就帶咗兩名保鑣，加上大會再安排嘅兩名保鑣，一共四人貼身為城城護駕。
不過城城嘅內地女歌迷實在太熱情，尤其嗰啲鐵人慈善賽嘅女參賽者，佢哋見到城城好似烏蠅嬲蜜糖咁，衝破防線，死攬住城城唔肯放，有女歌迷重偷襲城城嘅面珠成功，偷吻咗城城一啖，城城呢鋪都算蝕底嘞！城城話：「上海姑娘真係好熱情，我俾佢錫咗七秒先推得開，而且喺我走時，重發現有媽咪抱住BB追車，真係好危險。」
何韻詩噚日喺旺角舉行簽名會，大約有二百個fans到場支持，而阿詩嘅父母亦都有出席。
阿詩話梅艷芳都有叫佢去參加演藝界大遊行，不過由於個簽名會一早定咗日期，惟有精神上支持啦。阿詩重話對於《東周刊》停刊一事會大力拍掌，因為咁樣可以警惕一吓傳媒。
陳小春日前接受港台《舊日的足跡》訪問時，自爆試過因為緋聞而流下男兒淚，佢話：「嗰陣時第一次有緋聞，當時唔知點做，所以試過喊，跟住都冇嘞。」而小春亦坦言與謝霆鋒、陳曉東嘅關係並唔係想像中咁惡劣，佢話大家見到面都會打招呼同傾偈。
車婉婉今晚將會向堪輿學家麥玲玲拜師學藝，佢哋重會有正式拜師儀式。車婉婉學咗塔羅牌占卜後，開始對玄學有興趣。
馮仁昭噚日問麥玲玲點解會收車婉婉做入室弟子，佢話：「我覺得佢對玄學呢方面有濃厚興趣，而且見佢喺呢方面好有天份，咪破例收佢做徒弟。」
鄭則士（Ken哥）噚日喺旺角出席亞視新劇《法內情2002》嘅簽名會。
提起Ken哥嘅老友、無綫前導演譚朗昌涉嫌喺內地因盜版而被捕一事，Ken哥就話：「根本係內地個老闆欠譚朗昌錢，我有同佢太太聯絡，譚朗昌俾人囚禁咗個幾月，佢太太都只係透過律師見過佢張相咋。」
袁詠儀（靚靚）噚日去旺角出席劇集《法內情2002》簽名會。提起套劇嘅主題曲𠵱家由陳秀雯主唱，做中間人聯絡肥媽瑪利亞唱主題曲嘅靚靚勞氣咁話：「都唔明點解搵陳秀雯唱，一早講好肥媽唱嘅。」《法》劇製作人蕭若元知道靚靚不滿，佢即刻話：「我哋𠵱家會用番肥媽首歌做插曲，唔會搵陳秀雯做宣傳，我哋同亞視各有各做啦！」