早前曾遭人毆打的梁思浩，對於《東周刊》因刊登女星裸照而遭演藝界聲討一事，他昨日顯得心情甚佳，並以過來人身份呼籲該名受害女星盡早聯絡警方。
自從《東周刊》以某女星多年前被迫拍下的裸照作封面後，連日來引起極大迴響，尤其是演藝界人士特別關注，早前曾被人毆打的梁思浩，昨日在奧海城出席無綫台慶宣傳活動時，以過來人身份，呼籲受害者盡早與警方聯絡。
思浩昨日心情甚佳，他說：「開心，開心，今日心情特別靚，曾幾何時俾呢本周刊屈過嘅藝人都會好開心，何況我多次受害，嗰陣時我哋直頭冇聲出，係唔係都擺你上封面！我絕對支持今次行動。」
思浩亦向受害女星作出呼籲，他說：「我想以過來人身份話畀佢知，應該企出嚟同警方合作，可以絕密咁落案，唔需要曝光。如果佢真係需要幫助，可以透過Maria（指一位兩人都相識的朋友）搵我，我再解釋畀佢聽。」
何超瓊（Pansy）昨日以公益金籌劃委員會主席身份出席台慶活動，其間Pansy神色凝重，活動完畢後只逗留幾分鐘便匆匆離開。
對於《東周刊》停刊一事，Pansy起初不願表態，其後記者問雜誌刊登有關女星的裸照是否很不道德時，Pansy才停下來說：「我從來都唔支持傳媒濫用新聞自由嚟踐踏同揭發藝人私隱，同埋罔顧人權，報道會影響社會風氣，唔係一本雜誌嘅問題，整個傳媒都要反省。」
採訪、攝影：卓寶花