無記有位姐仔叫做「逢人嗲」，佢嘅電力足夠供應成座電視城，同佢合作過嘅男藝人幾乎無一幸免俾佢電親。
最近「逢人嗲」同無記一位花弗男藝人傳緋聞，馮仁昭之前都唔係好信，但馮仁昭有個老友咁啱住喺花弗男藝人跑馬地屋企附近，所以不時見到「逢人嗲」上門拜訪。
由於「逢人嗲」成日俾狗仔隊跟，所以練就一身超凡隱身術，老友話「逢人嗲」每次等到凌晨十二點之後先至會上男藝人屋企，貪咁夜冇乜人見到喎，佢重有埋花弗男藝人屋企嘅鎖匙，隨時自出自入，所以佢上男藝人屋企過夜就會神不知鬼不覺。可惜「逢人嗲」唔記得有句說話叫做「若要人不知，除非己莫為」，跑馬地唔止多狗仔隊，馮仁昭亦有好多線眼㗎！
李蘢怡（Tiffany）噚日去赤柱為「齊滅罪．助更生群星魅力展繽紛」行騷，之後去旺角新世紀廣場，出席電影《五個嚇鬼的少年》宣傳活動。
原來Tiffany覺得Shine嘅徐天佑好靚仔，又同記者講話天佑比又南靚仔，重不停咁讚天佑人品好，又成熟兼愈嚟愈靚仔，問Tiffany同天佑有冇機會發展，佢就話：「我哋只係好朋友！」
胡楓（修哥）噚日喺尖沙嘴出席「楓Show人生七十年胡楓演唱會」答謝宴，舊拍檔吳君麗重錫咗佢一啖。修哥話嚟緊無綫台慶會表演跳HipHop舞，佢話只要難度唔係好高嘅話都冇問題。問修哥仔女有冇勸佢退休，佢話：「我老婆話我成日都講唔聽，𠵱家只會叫我唔好捱夜，我自己一向都係當興趣，唔會覺得辛苦，做到自己做唔到為止。」
日本人氣組合V6噚晚喺會展舉行首場演唱會，佢哋除咗講廣東話之外，重專登喺日本運咗五座可以升降嘅油壓燈塔嚟，令到fans好鬼興奮，因為V6企喺塔上面，可以伸展到舞台外向fans揮手。今次演唱會嘅工作人員超過一百名，堪稱V6所屬嘅尊尼事務所旗下藝人中，規模最大嘅亞洲演唱會。
其實V6前日下午靜雞雞拜訪日本領事官邸，之後就喺會展綵排，雖然有大批fans連夜跟蹤，但係都見唔到偶像。
台灣人氣組合F4成員之一嘅周渝民（仔仔），噚日喺台北西門町舉行一場寫真集握手蓋印會，雖然仔仔一直自嘲胸肌唔夠另一成員言承旭健碩，但佢單靠笑容同眼神，已經令寫真集喺十五日內突破三十五萬本。而言承旭好多謝仔仔讚賞佢嘅身材，不過佢亦安慰仔仔話：
樂壇新人臨記Fans唔入戲
樂壇新人因為家底唔錯，唱片公司就全面催谷呢條大水喉。有傳樂壇新人用錢請歌迷，喺佢每次出席公開活動嗰陣造勢。日前呢位樂壇新人又去一個活動，佢嘅歌迷準時到場，準時收工，於是有口痕友話：「畀錢請歌迷，唔怪得之佢哋咁樣啦。」其實奉勸樂壇新人，下次要叫啲臨記歌迷做得入戲啲，如果唔係又俾人懷疑啦。
玉女歌手近日因為情海翻波，身形大變兼行為失常。馮仁昭日前喺中環一間髮型屋撞到玉女歌手，佢當時準備set頭出席宣傳，喺等候期間不停咁飲可樂同煲煙，又大聲講嘢，佢重話呢排成日留喺屋企打機，唔知係咪想投舊愛所好呢？不過玉女歌手煙不離手，就好影響形象喇。