狄龍：都識咗成三十幾年啦！佢係我哋大師兄，所以可以幫到乜嘢我都會幫手，我知佢心臟一向都有事。唔好睇佢外表大大隻，重係馬來西亞健美先生，上次都已經試過一次心臟有事，不過今次呢個消息嚟得比較早咗啲，始終人生苦短，之前就張徹同羅文，真係生一回死一回，所以要珍惜眼前人，點都好我會尊重佢屋企人嘅決定。
歐錦棠：呢個消息真係好突然，我上個月喺深圳先至見過佢，知佢開班教人做戲，重諗住佢𠵱家生活幾好㖭。雖然我同羅烈唔算深交，但都合作過幾部電視劇，佢份人好豪爽，好肯教後輩同提點新人，當年合作，佢都教過我好多嘢，大家見當年一班藝員為佢籌款，就知佢人緣幾好啦。少咗一位良師前輩，真係好可惜。
黃樹棠：我今朝收到羅烈喺內地嘅屋企人電話，話佢過咗身，覺得好可惜。我同佢喺邵氏已經識，都成三十幾年朋友，依家都要睇佢屋企人點去處理，要睇吓身後事喺香港定係喺內地搞，我都會上去睇吓有乜嘢可以幫手，不過要等聽日佢屋企人打畀我先知點做，總之一切都會尊重佢屋企人意見。