較早前，我哋曾經為大家介紹過，由ComeMon推出嘅CarPC汽車電腦，當時該系統已備有多項功能；而第二代型號亦經已推出，並增設有多項新功能，其中包括全港獨有嘅地域帶路、倒車鏡頭等等，從而令方便程度有所提升。究竟有幾好？大家不妨一齊嚟睇睇。
記者、攝影：郭信強
屬第二代嘅CarPC，除可透過最新電子地圖及衞星定位系統，得悉身處地方附近嘅地鐵站、油站、停車場等位置外，同時你亦可輸入目的地嘅區域名稱，最新嘅電子地圖就會顯示出最直接嘅路線，只需沿指示路線行駛，便能輕易到達目的地；而預計響今個月底前，重會加入資料詳盡嘅中國地圖，咁就算自己揸車由香港去北京都無有怕啦！
另外，此系統亦可接駁專用倒車鏡頭，當你將波檔撥入R檔後，屏幕就會顯示出車尾情況，同時亦會計算座駕與障礙物嘅距離，當距離過於接近時便會發出警號通知駕駛者。
另外，你重可以透過呢套系統，利用GPRS技術上網而獲得各項最新資訊，又或者Click入運輸署網頁，觀看最Update嘅路面情況，當然重可以利用衞星導航系統，全天候24小時知道閣下汽車所在嘅位置，同時又可以播放MP3、觀看VCD，甚至係唱卡啦OK都得㗎！
售價：$16,800（連安裝及鍵盤）
$4,800（全中國地圖）
$3,580（倒車鏡頭）
查詢：MacPac（28560800）