日前發生了一宗劫龜事件！3隻共值$9,000的二級瀕危豹紋龜被搶掠；而Vincent所養的四十多隻龜同樣也是受保護的矜貴龜。高峯時他共養了140隻，所以不少人都笑稱他是龜癡，「但我唔會攬住隻龜瞓，唔會幫佢哋改名，只想從飼養中吸收對龜嘅認識。」
記者：吳佩璇
攝影：周旭文
後宮佳麗這麼多，最得Vincent疼錫的要數年逾10歲的塞舌爾群島巨龜。牠乃龜中巨無霸，屬現時全球體積第二大的陸龜，加上批文限額少，是陸龜巿場上最值錢的。而Vincent由BB仔開始將牠湊大，今日巨龜的龜殼已經有成70厘米長，大到連屋企個浴缸都放唔落！不過，巨龜2歲時曾患上呼吸系統疾病，病情嚴重，Vincent幾乎每日都要帶牠看獸醫。經過了兩個多月調理，仍沒半點起色，個幾月沒進食。Vincent憶述：「本來都打定輸數，點之忽然有日佢食番嘢，之後離奇地喺短短幾日之內康復！原來龜嘅生命力真係咁強！之後就養到𠵱家。佢死過翻生，特別難忘。」
除了這隻從死神手中撿回來的巨龜，Vincent前前後後養過80種不同種的龜，高峯時千呎大屋住了140隻龜！如此瘋狂，皆因年少時的Vincent曾立志：「全世界有260幾種龜，我想每種都養到1隻。」如此夢想最後當然不能成真，加上家人的投訴，惟有又送又賣，剩下40幾隻，其中三分二是湊了逾10年的心肝寶貝。今天Vincent體會到：「睇住一隻由火機咁大嘅龜仔，健康成長到面盆咁大，嗰種喜悅已經好滿足！」數年前Vincent搬新居，更預留了一間百呎「龜」房，給他們作安樂窩。
40個兄弟姊妹共處一室，從不會爭風吃醋或打大交，事關烏龜是冷血動物。「龜係低智商動物，唔會好似狗咁有性，但講時間同工夫，唔好以為好似倉鼠咁易養，但一定冇狗咁難湊。」Vincent每日都會花個多小時餵飼龜仔、清理龜缸，再加二十多年的養龜經驗，已將這一家數十口打理得頭頭是道。而養得久一點的老龜們也學精了，只待門一打開就知是Vincent來餵食，便四腳爬爬「嬲」埋身！
細龜身體水份流失得快，所以每天都會替牠們浸浸水，水溫約38oC、浸至殼邊、每次浸15分鐘。年紀愈大的龜貯水能力較高，則可減少次數：2歲以上1周2次；5、6歲1周1次；10歲1月1次。
龜一般宜住在28-30oC溫暖環境下，冬天不妨加塊電熱氈或在缸內安上發熱器或燈膽。寵物龜少機會接觸陽光，若牠們吸收不足陽光中的UVB，很易罹患骨骼畸形。建議在缸內加裝UVB光管，每日照牠們8-10小時。
每日餵1餐，最啱洗完白白後進食，等佢醒神開胃啲。陸龜都是素食者，宜揀高纖維的蔬菜，如菜心、芥蘭。西生菜一類高水份食物不宜吃過多，影響牠們的消化系統。
龜科本身分有水龜、盒龜、海龜等不同種類。一般作為飼養的有水龜（Turtle）和陸龜（Tortoise），前者如巴西龜，較粗生易養，陸龜則較矜貴。因為凡陸龜都屬受保護品種，基本上分有一級和二級保護。一級乃高度瀕危品種，不准買賣飼養，二級瀕危品種須向政府攞牌才可飼養。牌照費每種$140，約十四日批出。