楊受成昨日發表聲明宣布《東周刊》停刊，但此舉未能平息民憤，全港五大唱片公司正東、Sony、環球、華納及EMI，昨均表示會盡量派出旗下歌手參與今日的集會行動，有唱片公司更誓言會繼續作出杯葛，拒絕接受《東周刊》訪問。
今期《東周刊》封面刊登某女星多年前被強迫拍下的裸照，全港各大團體及不少機構均對《東周刊》作出強烈譴責，雖然楊受成昨日已用個人名義發出聲明，宣布該周刊馬上停刊，但此舉未能平息民憤，影圈十大屬會今日舉行的集會行動，除獲多間唱片公司包括正東、Sony、環球、華納及EMI等唱片公司支持外，他們更揚言會繼續杯葛該周刊，短期內也不會再讓旗下歌手接受該周刊訪問。
環球唱片公司唱片部經理黃健豪，昨接受本報電話訪問說：「我哋一定會支持杯葛行動，因為《東周刊》報道出嚟嘅嘢唔符合事實，我哋公司嘅藝人之前已經唔接受佢哋訪問，我哋今日都會搵藝人出席集會。」
EMI唱片公司總裁陳志光亦透過電話說：「我今日收到IFPI嘅電話，我哋好支持呢個行動，𠵱家睇吓邊個歌手嘅時間可以，就搵邊個出席，佢哋嘅做法唔值得支持，暫時我哋都唔會畀旗下歌手做佢哋嘅訪問，同埋我哋冇喺嗰本雜誌落廣告。」
Sony唱片公司唱片部經理王凱文亦說：「我哋已經通知旗下歌手，盡量出席今日嘅活動，《東周刊》未發生呢件事之前，我哋已經冇畀歌手做佢哋訪問，原因係乜嘢，大家都知啦，唔使多講。」
作為英皇旗下分公司的紅音樂，其負責人黃劍濤昨日說：「我哋未收到有關嘅通知，如果佢哋搵我哋公司出席都會支持，而我哋嘅藝人短期內都唔會做《東周刊》訪問。」正東方面同樣表態，會拒絕旗下藝人接受《東周刊》訪問，今日正東亦會派出歌手參與集會。
此外，華納方面則稱會支持演藝界於今日舉行之行動。