外表開放的YoYo，經常都以性感裝束示人，甚至在公眾場所穿着三點式泳衣也毫不忸怩。原來YoYo是一名廚藝高手，早在十歲時，YoYo已肩負炮製一日三餐嘅重任，所以對每款小菜都略懂一二，正因YoYo的廚藝了得，小記即席叫YoYo用當造嘅芋頭示範兩款小菜，都難佢唔倒！
記者：區佩嫦 攝影：陳盛臣
唔好睇YoYo咁惹火，就以為佢只係識去蒲，「由細至大都要做家務，煮飯當然唔少得！無話邊個教，跟阿媽學吓學吓就得，得閒再研究吓食譜，自然熟能生巧，要煮乜嘢餸都得。」小記聽YoYo邊講邊煮，煮起上嚟真係幾耍家。
芋頭最緊要輕身，煮出嚟先至夠粉，老闆娘幫YoYo揀咗個芋頭後，重幫佢㓟埋皮，的確好人。
YoYo話帶子新鮮當然好味，不過用嚟炸就較為嘥，所以佢就買急凍帶子，貪佢哋夠晒大粒，食起上嚟又夠彈牙。
YoYo話芋頭最好用嚟燜，好似呢個芋頭豬柳煲，做法簡單，配上炒香嘅豬柳片，入口夠滑夠香，平日YoYo就經常喺屋企煮畀家人食。
賣相麻麻，不過豬柳肉又腍又滑，加埋椰汁同芋頭嘅香味，用嚟撈飯絕對一流。
椰汁半杯、芋頭6両、柳脢半斤、葱段1條、蒜茸2茶匙、薑3片
這味香芋釀帶子就係YoYo睇食譜學嘅，YoYo覺得呢個餸夠特別，帶子包住芋茸，感覺有啲似酒樓食開嘅芋角，不過就無芋角咁油膩咁Heavy，芋茸炸後外表脆卜卜，入面軟腍腍。呢個釀帶子咁有諗頭，再加上識得用生菜絲索油，足見YoYo的廚藝有番咁上下。
小記本身都幾鍾意食芋角呢類炸嘢，覺得呢個釀帶子外層脆卜卜，幾好咬口，入面嘅帶子就又滑又甜。
芋頭半斤、帶子6粒、生菜3塊