上星期個市陰陽怪氣，恒指喺連升兩個禮拜後好似想掉頭回落咁，不過就跌得唔多，個市似乎未玩完，尤其係幾隻大藍籌跌極都重有龐大買盤入市。有行家估計個市可能只係調整一下，當今個禮拜三美國減息，班好友會再次出動，不過唔知有冇人諗過今個禮拜如果唔減息，個市又會點算呢？
上個禮拜初，超大（862）喺復牌後急跌，累到啲民企俾班大孖沙狂插，不過個市又唔係完全無晒鑊氣，就好似隻鄭州燃氣（8099）咁，上市後仍然可以維持雷霆萬鈞之勢繼續上升，班大戶掃貨絕不手軟，由上市價兩毫半升到去最高0.43元。
隻股仔今次上市係用批股方式進行，街上無乜人有貨，有行家同伏勝講，話隻股仔重有得諗，因為班大戶重未出晒貨，又話個價可以去到5毫仔。不過睇番個價上到去四毫三後，成交額突然大咗好多，好似有人喺度沽緊貨，照伏勝一向嘅宗旨，一啲升咗咁多嘅股票都係少掂為妙。
另一隻又係俾其他民企拖低咗嘅大成生化（809），喺上個禮拜五尾市由低位1.6元水平，俾人掃番上去個七收市，個走勢似足大戶Mark收市價咁。
聽個大行經紀講，有個客之前揸咗好多呢隻股份，知道隻股仔唔會好似歐亞（932）咁差，所以喺禮拜四開始叫個經紀幫佢有幾多買幾多，不過由於個價實在太低，同埋無乜人跟沽，所以三爬兩撥就掃咗上嚟，成交額只係升到去800幾萬股。
由於隻股的確有業績支持，個客話隻股會上番去兩蚊水平一啲都唔奇，個朋友話，如果今個禮拜再有個七樓下嘅話，即管入番些少。
伏勝