花三十一萬𠱁到特首同兩個女人開心，到底值唔值呢？使錢嗰位係賭王何鴻燊，兩位女士就分別係特首夫人同賭王二太太藍瓊纓。
話說前晚理大喺會展搞六十五周年晚宴，名人雲集。晚會嘅高潮就係拍賣環節，由至威水嘅理大校友梁振英做拍賣官，個個有錢佬爭住出風頭做大豪客；董生同董太分別捐咗一本書同一幅畫出嚟拍賣，本書係九十幾歲嘅植物學家胡秀英所著嘅《WildFlowersofYunnanandCentralChina（中國中部及雲南野生花卉）》，幅畫就係張春林大師嘅水墨畫《鳥》，兩樣嘢夾埋底價五萬蚊。
最捧特首場都算係胡應湘同賭王，兩人晚宴前齊齊話唔反對政府加利得稅解財赤，拍賣時又爭相出價，各不相讓。其間發生咗一段小插曲，振英哥提議不如投暗標，大家唔知對方出乜嘢價，可以緊張啲，點知賭王堅決反對而作罷。最終賭王以壓倒性嘅氣勢，出三十一萬投得書畫，係全晚嘅最高價。
賭王好神氣咁話：「我係志在必得嘅，幾貴都要投番嚟，會送畀二太太。」咁唔怕四太梁安琪呷醋咩？賭王話：「梗係唔會啦，因為二太太係書蟲嚟嘅。」
傳真︰2623-9278
電郵︰