對於《東周刊》停刊一事，富豪劉鑾雄（大劉）昨日接受電話訪問時說：「停刊係停一日、抑或一期、兩期？某人不嬲都唔怕面懵，當香港六百萬市民係白癡，佢做得出㗎！香港史上有冇試過咁多政黨同媒介齊齊譴責一件事呀，身為老闆梗係責無旁貸啦，但係有人都可以話佢唔知㗎，直至出面好大反應佢先知，但係最重要係人哋信唔信！」
大劉續道：「今次有人受咗壓力，知道好大鑊，佢察覺唔止香港政府當局留意呢件事，可能牽涉到其他層次，驚後患無窮，所以咪急急腳補鑊囉！到時炒咗個茶水部阿嬸，等風頭火勢過咗咪復刊囉！」
問大劉若他是該周刊的老闆會如何處理，大劉說：「如果係我，無論我經濟能力容唔容許，我都會把心一橫，令到本周刊永久停刊，因為只有咁做，先至可以平息民憤，有少少機會唔會有麻煩跟尾。」