馬主H自上海回來，問佢印象如何，馬主H話：「啲建築物冇得頂，靚過香港多多聲。上海有『後行者』優勢，將啲靚樓集中喺淮海中路一帶、陸家嘴一帶，七八十年前又有外灘建築群，於是形成每個區嘅氣勢。舉個例，假如你將德輔道、皇后大道中改為一條大馬路，大路兩旁放上長江中心、中銀大廈、萬國寶通廣場、置地廣場、太古廣場、中環廣場、力寶中心、滙豐銀行、太子加歷山大廈，至到中環中心，十大名廈擺埋一齊，你話幾有氣派呢！」嘩，諗吓都覺得過癮，只可惜係紙上畫餅充飢。
上海咪叻過我哋？馬主H話：「咁又未必，喺連卡佛外面條大街，身高五呎七，着四吋高踭鞋，衣着入時服飾嘅靚女，睇到我眼花撩亂，只可惜不時有一兩位嬌咤一聲，桔皮、紙團脫手而出，丟垃圾手法十分純熟，直情係擲到慣嗰種。睇見咁嘅情形，我又覺得香港輸唔晒啦，我哋啲軟件文明係好啲嘅！」
同上海比較，不爭今朝，要睇吓佢啲新型建築物，三五年後嘅情況如何。內地機構不擅於維修保養，物業管理重有排學。之不過，馬主H話香港唔可以等人唔掂，一定要假設到人好掂至得，否則就會輸晒。唉，香港領導人對此冇乜認識，已在掘斷自己龍脈，睇怕都係會輸畀上海，董建華、梁愛詩、葉劉淑儀呢個鐵三角，求求你，請請你，睇清楚林行止篇十月二十九日大作啦！