今個星期嘅DVD新碟，俾兩個中外古今嘅傳奇故事包圍，一個由中國唐朝唐三藏玩到現代嘅《奪寶奇兵》式盜寶故事《天脈傳奇》；另一個係有關古埃及第一個法老王誕生嘅《盜墓迷城外傳：蠍子王傳奇》。佢哋喺香港上畫時，票房同口碑都唔錯。
記者、攝影：朱崇德
《天脈傳奇》係鮑德熹憑《臥虎藏龍》揚威美國奧斯卡獲得「最佳攝影」後，親自操刀做導演之作。食住老本行，《天脈傳奇》畫面表達真係有如詩般流麗炫目，再加上在中國青島、西藏及拉薩實地取景，畫面超靚已屬必然，有時大家可能會誤會自己睇緊中國河山大川旅遊大電影！
傳說古時的敦煌僧人，將唐三藏的舍利子安放於一個普通人不能接觸的地方，並交由一個白姓的雜技家族代為看管，雜技家族後裔白嫣飛（楊紫瓊飾），在一次機緣巧合之下，重獲可尋找舍利子傳說的重要線索敦煌之心，白嫣飛被不擇手段的富商卡爾窮追不捨，由青島街頭追逐至敦煌大漠，最終誰能奪得寶藏呢？
電影畫面表達超靚，兼有國際武打女明星楊紫瓊坐鎮，最刺激係全劇最尾一幕的敦煌藏寶古洞內，楊在火海石柱陣中作高空戰鬥，的確拍得非常賞心悅目，並能引領出全劇的高潮。大家可多加留心楊之弟弟白躍童（張卓楠），其身手及演技唔錯，而且又夠後生靚仔，是一個幾討好的角色。
一定要留意「MakingOf」，今次全劇喺青島、西藏及拉薩實地取景，好多刪咗冇出街嘅靚景畫面，呢度可以睇番晒！只欠朱維德嘅旁述，否則你會以為睇緊《大江南北》！
價錢：$98
區碼：3區
發行：MegaStar
由《盜墓迷城》原裝人馬攝製嘅《盜墓迷城外傳：蠍子王傳奇》，故事類型同一、二集好唔同，講述古埃及第一個法老王蠍子王如何成王的人生歷程，真係有啲似當年阿諾舒華辛力加嘅《王者之劍》。
尾聲的「刺客」大戰掄着雙火劍的「邪惡暴君」，過程全冇電腦特技，絕對硬橋硬碼打真軍！DwayneJohnson都因此而被輕微燒傷。
在Bonus內有一個叫「EnhancedViewingMode」，開啟後再播放電影，它會將被刪剪的片段，重新Edit在播放中的電影內，新舊對照，睇得非常清楚。
價錢：$98
區碼：3區
發行：MegaStar
DIGITALSHOP
電話：23965321
地址：旺角花園街75-77號花園商業大廈9樓903室