宣萱昨日在奧海城出席爽健鞋墊宣傳活動，並表示支持杯葛《東周刊》行動，她說：「我之前都俾呢本周刊出賣過，有個記者話要交料，想跟我半日報道行程，當時出於好意就應承佢，點知出咗嚟就話我人氣跌，令我好嬲，但今次登裸照事件好冇道德，相信政府都要做啲嘢。」
而劉德華昨日在商台錄廣播劇時，對於曾經被傳遭人以手槍威迫拍戲，他澄清說：「都冇呢件事，當年Ｏ記都有搵我，我對警方一定講真話，其實電影公司搵我傾戲都好客氣。」
另外，華仔又說：「如果今次裸照事件係雜誌社一時之快嘅決定，係可以原諒，但若係深思熟慮嘅決定，呢種行為唔應該喺世界出現。我唔知當事人嘅心情，呢啲嘢唔應該一、兩個人面對，而係集藝人力量去表態，我覺得成件事阿梅（梅艷芳）處理得好客觀。」